TWO-SECOND DELAY

Gusto ko sana gumawa ng bagong episode ng kraMTV at dumaldal nang dumaldal kaso bigla akong tinamad at inantok. Wala na ata akong ginawa ngayon kung hindi matulog at umidlip. Buti na lang at nakansela ang pagsusulit kanina sa isang asignatura. At nang pumasok ako kanina sa klaseng ito, bigla ba namang sinalubong ng propesor ang klase ng anunsyo na C+ ang pinakamataas na naibigay niyang marka sa unang kritikal na papel sa mga papel na naiwasto na niya. Hindi ko alam kung kasama ako sa natirang mga estudyante na binigyan niya ng pangkonsolasyong C. Nakakaloko ang ganitong sitwasyon. Kung tutuusin, isa ito sa mga papel na talagang binusisi ko; tapos mababalitaan ko na ganyan ang mga markang maaari kong makuha. Bagamat wala naman talaga akong pakialam sa mga marka, nakakadismaya lang na parang sinabing walang saysay yung ginawa mo, na binigyan ka lang ng marka dahil ginawa mo; okay lang sana kung sa ibang klase ko makuha ang ganyang paliwanag dahil di ko naman talaga isinasapuso ang mga gawain sa mga klaseng wala talaga akong affinity, pero ang malaman mong walang saysay ang pinaghirapan mo, ang pinag-isipan mo - ibang usapan na ata yan. Pero di pa naman tapos ang laban, di ko pa alam kung ano ang kapalaran ko. Gusto ko lang sabihin na may inaasahan ako rito. At dahil sa aking pagmamahal sa mga paniniwalang animistiko, winiwika ko, kapag nakakuha ako ng marka na mas mataas sa nabanggit na pinakamataas (o kapag ako ang pinakamataas) mananalo ako ng Best Screenplay sa Oscars! Hahaha!

Malapit na ang Pebrero! Malapit na ang Oscars! Malapit nang magpaalam sa kurso! Malapit nang makalipat sa bagong kurso! Malapit nang mabuhay muli si Makoy!