NORMAL

Ilang oras na ang lumipas nang sabihin kong matutulog muna ako bago ko gawin ang mga dapat kong gawin. Ilang oras na rin ang nakalipas nang nagising ako mula sa aking pagtulog ngunit hanggang ngayon, wala pa rin akong ginagawang 'produktibo'. Sa ngayon, ako lang talaga ang kilala kong gago na nakagagawa nito - na sa kabila ng malapit nang pagkuha ng mahabang pagsusulit, pagpasa ng mga papel at pangangailangang mag-aral para sa isang napakademanding na asignatura, heto ako, nakatunganga, naghihintay ng isang taong katulad ko na kakausap sa akin. Sadyang ganito talaga ako. Hindi ko alam kung bakit. Sa usaping 'priorities' (kung kilala mo ko), alam mo naman na siguro kung ano ang tunay na mas matimbang at mahalaga sa akin. Iyon lang naman ang pinagtutuunan ko ng pansin ngayon, kahit mag-isa, gagawin, tatapusin - dito ako masaya eh. Siguro ito na nga ang paulit-ulit na binabanggit ng mga tao tungkol sa akin. Ang buhay nga naman... Hindi mo alam kung saan ka nito dadalhin, pero kaya ka nga may mga paa at sariling pag-iisip, para kahit paano, mamaneobra mo ang direksyon mo; tangayin ka man palayo, makababalik ka pa rin... Kung gugustuhin mo.